12, జనవరి 2014, ఆదివారం

పెళ్ళాం ఊరెళ్తే...


రఘువాళ్ళ ఇంట్లోవాళ్ళంతా ఊరెళ్ళారు. దాంతో మనోడికి రెక్కలొచ్చేశాయి. ధూం ధాం మొదలు. ఫ్రెండ్స్ తో కలిసి  మాంచి పార్టీ చేసుకోవాలనిపించింది. పిలవాలనుకున్న వాళ్ళందర్నీ పిలిచాడు. వస్తూ వస్తూ బయట CD షాప్ నుండి ఫలానా సినిమా CD తీసుకొచ్చేయ్, సరదాగా సినిమా చూస్తూ ఎంజాయ్ చేద్దాం అంటూ.. శశిగాణ్ణి పురమాయించాడు. ఒరేయ్ ఇలాంటి సందర్భంలో "ఆ సినిమా" అవసరమా అని వాడు అంటుంటే, నీకు తెలీదురా.. ఇలాంటప్పుడే "అవి" కావాలి, ఇంట్లో ఎవరూ లేరు, మనదే రాజ్యం, నువ్వేం భయపడకు అని గట్టి అభయం ఇచ్చాడు. కానీ మనవాడికి షాప్ కి వెళ్లి అసలీ విషయాన్ని ఎలా అడగాలో తెలీక తెగ ఇదైపోతున్నాడు. ఎందుకంటే.. ఇంతకు ముందు ఏనాడూ ఇలాంటి పాడు పని చేసిన అనుభవం లేదు మా గ్రూప్ లో వాళ్లకి. ఇదే మొదటిసారి. కానీ ఎలా..? తీసుకురమ్మని వాడి గోల. అడిగితే షాప్ లో వాళ్ళు ఏమనుకుంటారో అని వీడి టెన్షన్. ఏం చెయ్యాలో తెలీట్లేదు శశిగాడికి. నువ్వు కూడా రారా అని నన్ను అడిగాడు. సరేలే, చావో రేవో ఇద్దరం కలిసే అనుకుంటూ సాహసం చేశాం.

ఎలాగో నన్నూ, ధైర్యాన్నీ కూడగట్టుకుని తీసుకెళ్ళాడు. "నేనైతే షాప్ లోకి రాను.. ప్రతిరోజూ ఒకే కాలనీలో ఉంటున్నవాళ్ళం, ఇలాంటి పని నేను చెయ్యలేను, అసలే చిన్నప్పటినుండీ ఆ షాప్ అంకుల్ కి మనమేంటో తెలుసు. కాబట్టి నీ పాట్లేవో నువ్వే పడు. నేను షాప్ బయట బైక్ మీద రెడీగా ఉంటాను.. నువ్వు పని కానిచ్చుకుని వచ్చేయ్" అని ముందే చెప్పేశాను.

ఈ సారి నన్ను తీసివేసి, ధైర్యాన్ని మాత్రమే కూడి, సాహసాన్ని గుణించి, షాప్ లోపలికి భాగహారం కోసం వెళ్లి మొత్తం పరికించి చూస్తున్నాడు. ఎక్కడా కనిపించట్లేదు. షాప్ లో ఇంకా కొంతమంది కష్టమర్స్ కూడా ఉన్నారు. ఇప్పుడు వీడు 'ఇది' అడిగితే వాళ్లకి వినపడుతుంది. ఎక్కువసేపు అక్కడే ఉంటుంటే.. "ఏం కావాలి సార్..నాకు చెప్పండి మీకేం సినిమా కావాలో. మా దగ్గర అన్నిరకాల సినిమాలూ దొరుకుతాయి" అని షాప్ వాడి సణుగుడు. వీడి వాలకం చూసి షాప్ వాడికి ఏం అర్ధమయ్యి ఆ మాటన్నాడో కానీ.. వీడికి ఉన్నట్టుండి వొళ్ళంతా ఒక్కసారిగా చెమటలు పట్టేశాయి. సరే.. వీడి మనోభావాలని అర్ధం చేసుకున్న సదరు కరుణామయుడు... పర్లేదు చెప్పండి సర్.. మీకేం సినిమా కావాలి.. ఇది కావాలా అంటూ... ఒక సినిమ సీడీ చూపించాడు. ఉహు.. అది కాదు అన్నాడు శశిగాడు. ఇలా ఓ నాలుగైదారేడు సీడీలు అయ్యాక.. వీడి దగ్గరికొచ్చి షకీలా సినిమా ఉంది ఇమ్మంటారా అంటూ రహస్యంగా చెప్పాడు. "అబ్బ్...బ్...బ్..బ్బా.. అది కాదయ్యా నాక్కావలసిందీ" అని వీడు ఏడుపుమొహం పెట్టేశాడు సూటిగా అడగలేక. పోనీ.. పెద్దలు మాత్రమే చూసే సినిమాలు.. ఇంగ్లీష్...   ఉన్నాయ్..ఇమ్మంటారా.. మొహమాట పడకండి.." అని నవ్వుతూ అనేసరికి.. వీడికి చిర్రెత్తుకొచ్చి... ఏం వెటకారంగా ఉందా అంటూ ఒక్క అరుపు అరిచాడు. మరింకేం కావాలి సార్ అని వాడు భయపడుతూ అడిగాడు. అప్పుడు వీడు షాప్ వాడి దగ్గరికెళ్ళి.. వీడిక్కావలసిన సినిమా పేరు అతి రహస్యంగా చెవిలో చెప్పాడు. అది పొరపాటున అక్కడున్న కష్టమర్లలో ఒకళ్ళకి వినిపించింది. దాంతో సదరు కష్టమర్, "ఛీ ఛీ.. ఏం మనుషులో ఏంటో.. సభ్య సమాజంలో ఉంటూ.. ఫామిలీస్ ఉండే కాలనీలో.. ఇలాంటి వాళ్ళు.. ఛ ఛ" అని గొణుక్కుని అక్కడినుండి బయటికెళ్ళిపోయాడు. ఆ షాప్ వాడు... తోక తొక్కిన తాచు లాగా లేచి... "రేయ్ వొళ్ళు తిమ్మిరిగా ఉందా... నడూ బయటికి" అని ఒక్క అరుపు అరిచాడు. లోపలి పరిస్థితి అర్ధమైపోయింది నాకు. వ్యాపారం చేసుకుని బతుకుతున్న వాళ్ళం.. మా దగ్గరికొచ్చి ఇలాంటి సినిమాల గురించి అడుగుతావా... బతకాలనుందా లేదా.. అంటూ బయటికి తోసేస్తే.. సరిగ్గా బైక్ వెనక సీట్ మీదికొచ్చి పడ్డాడు. 

మరుక్షణం పక్క వీధిలోకి ప్రత్యక్షమయ్యి...అప్పుడు నెమ్మదిగా బైక్ కిక్ కొట్టి మరో షాప్ కోసం వెతుకుతుంటే,. అక్కడొక షాప్ కనిపించింది. ఆ షాప్ వాడికి.. శశిగాడి మొహం చూడగానే పరిస్థితి అర్ధమైనట్టుంది.. "రండి సార్.. "మీక్కావలసింది... మా దగ్గర ఉంది... అందుకో.."  అంటూ వీణ్ణి చూసి... పాడేసి... కౌగిలించేసుకుని, హి హి హి అంటూ పళ్ళికిలించుకుంటూ పిలిచాడు. అంటే ఇందాకటి షాప్ నుండి తోసేయ్యబడ్డ వాళ్ళని ఈ షాప్ వాడు ఇట్టే కనిపెట్టేస్తాడన్నమాట. సరే.. ఇంకోసారి తిట్టించుకుందాం అనుకుంటూ వెళ్ళి అదే విషయం అడిగాడు. అది విని.. ముందు కొంత ఆశ్చర్యపోయి.. పైనుండి కిందికి ఓ ఐదారుసార్లు చూసి.. "వేషం చూస్తే ఇలా...  అసలు స్వరూపం ఇదన్నమాట.." అనే అర్ధంతో ఏడో చూపు కూడా చూసేసి.. ఆ సీడీ వీడి చేతిలో పెట్టాడు. దాన్ని తీసుకుని ఎలాగో రఘు వాళ్ళింట్లో గుమిగూడాం. ఇహ అనుకున్న ప్రకారం మనోడు మందూ ముక్కా సిద్ధం చేసి మా ముందు పెట్టాడు. అబ్బో...నాకు, అక్కడున్న వీరులందరికీ మందు "పేరు" చెప్తే చాలు... మత్తెక్కేస్తుంది... అదే పేరుని ఇంకో నాలుగుసార్లు చెప్తే హాంగోవర్ కూడా...!! అందుకే దాన్ని అలా స్మరిస్తూ... వేడివేడి పకోడీలు, చల్లచల్లటి మాజా స్ప్రైట్ లూ లాగిస్తూ కత్తిలాంటి సినిమా చూసేశాం..! అలా ఆ పూటకి అందరం ఎంజాయ్ చేసేశాం కానీ... ఇప్పుడీ విషయం ఎవరికైనా తెలిస్తే పరువుపోతుంది... వీళ్ళుకూడా ఇలాంటి వాళ్ళేనా అని చులకనగా చూస్తారేమో అని మనసులో ఏదో మూల శంక. ఆ రోజు సాయంత్రం చీకటిపడ్డాక ఆ సీడీని షాప్ లో ఇచ్చేసాం.

మా వాళ్ళలో ఒకడు... వాళ్ళావిడ ఊరి నుండి రాగానే పొరపాటున నోరుజారి ఈ విషయం చెప్పేసాడు.. "ఇంకోసారి ఇలాంటి పని చేస్తే... విడాకులిచ్చేస్తా" అని బెదిరించిందట. రవి పరిస్థితి మరీ దారుణం. కాబోయే పెళ్ళాం ఇది విని.. "ఛీ.. నువ్విలాంటి వాడివనుకోలేదు. నీ రంగు బయటపడింది. ఈ సంబంధం నాకొద్దు అనేసింది. "సంబంధం వద్దనుకునేలా ఏం పాడుపని చేశావురా..అని వాళ్ళన్నయ్య ఒక లెవెల్లో చీవాట్లు పెట్టాడు. చేసేదేం లేక మళ్ళీ సంబంధాల వేటలో పడ్డారు వాళ్ళు. రఘువాళ్ళ ఆఫీసులో ఈ విషయం ఇంటిగ్రిటి ఇష్యుగా పరిగణించారట. టైం బావుంది కాబట్టి బయటపడగలిగాడు. శశిగాడి ఆఫీసులో ఈ విషయం తెలిసి వాడితో రెండురోజులపాటు మాట్లాడ- కుండా వెలివేశారట.

ఇవన్నీ తెలుసుకుని నేనసలు ఈ విషయం ఎవరికీ చెప్పకుండా "తొక్కించేశాను". 

అవును మరి.. రోడ్ మీద జీప్ లో వెళ్తూ.. ఆకాశంలో వెళ్తున్న హెలికాప్టర్ని తొక్కించెయ్ అని గావుకేకలు పెట్టే సీన్ లు చూస్తే ఎవరైనా ఇలాగే అంటారు.  బాలకృష్ణ... "చెన్నకేశవ రెడ్డి" సినిమా సీడీ అడిగితే ఎవరైనా ఇలాగే చూస్తారు మరి. అసలే ఒక్క బాల్ కి రెండు సిక్సర్ లు కొట్టే టాలెంట్ మనోడిది.

కొసమెరుపు... 

శ్రీ సురేష్. శ్రీ అనేది వాడి పేరులో భాగం. అంతేకానీ వాడికి నేనిస్తున్న గౌరవం కాదు. విషయానికొస్తే... వీడు నా ఫ్రెండ్ కం కొలీగ్...!! ఈమధ్యే తండ్రయ్యాడు (చట్ట ప్రకారమే...!!) కొడుకు పుట్టినందుకు సంతోషించాలో బాధపడాలో తెలియని పరిస్థితి వీడిది. పుట్టినవాడి జన్మనక్షత్రాన్ని బట్టి "బ" అక్షరంతో మొదలయ్యే పేరు పెట్టాలని బ్రహ్మగారి ఉవాచ. చక్కగా కృష్ణుడి పేరు పెట్టుకున్నట్టు ఉంటుందిలే అని "బాలకృష్ణ" అని పెట్టాలనుకున్నాడట. అది విని... "ఆ పేరే పెట్టటం కనుక జరిగితే వీణ్ణి నేను పెంచుకోను, ఇంకెవరికైనా ఇచ్చేస్తాను" అని వీడి పెళ్ళాం బెదిరించిందట. దాంతో మనోడు భార్గవ" అనే పేరుతో శాంతపరచాడు వాళ్ళావిడని. (ఈ సంఘటన నిజంగా నిజం. ఇందులోని పాత్రలు పాత్రధారులూ అన్నీ నిజాలే...! ఏవీ కల్పితాలు కావు)

పురాణాల్లో రాక్షసుల పేర్లూ, చరిత్రలో దేశద్రోహుల పేర్లూ ఎవరూ పెట్టుకోరు. కానీ భగవంతుడి పేర్లలో భయపెడుతున్నది ఇదొక్కటేనేమో...!!!

జై బాలయ్య.